Едно топло летно утро, кога Ени - триесет и две годишна агентка за продажба на недвижнини - го напушта својот дом за да оди на презентација на куќа, таа има само три цели: да ја продаде истата куќа, да заборави на караницата со мајка ѝ од тоа утро и да стигне навреме за вечерата со нејзиното фино и трпеливо момче. Презентацијата на куќата не оди сјајно, па кога последниот посетител пристигнува баш кога Ени се подготвува да си замине, таа помислува дека среќата конечно ќе ѝ се насмевне. Реалноста е далеку од тоа.
Половина горчлива драма, половина неизвесен трилер, Ени ја раскажува својата приказна низ сесии со нејзиниот психијатар.
Една година помината во напуштена планинска колиба, една година киднапирана, тепана, изолирана, силувана, малтретирана и брутализирана.
И потоа, по нејзиното конечно ослободување, таа почнува да бара одговори на прашањето: Зошто? Но некои прашања е подобро да останат неодговорени...
Низ сесиите со психијатарот и во соработка со полицијата, Ени полека почнува да дознава некои работи, а ние - заедно со неа - почнуваме да се сомневаме буквално во секоја од нејзините најблиски личности. Кој би можел да биде одговорен за киднапирањето на Ени?
Исчезната без трага е реткост помеѓу трилерите: искрена, директна, шокантна, брутална книга преведена на 25 јазици...
„Често гледаме лица на убави, насмеани исчезнати жени на насловните страници. Си велиме: Кутрата жена... Но никогаш не ни паѓа на ум дека следната насловна би можела да ја носи нашата слика...“
Шеви Стивенс е автор на интернационалните бестселери Исчезната без трага и Никогаш не можеш да знаеш. Авторските права за филм за двете книги се веќе продадени. Исчезната без трага е нејзината прва книга инспирирана од нејзините лични искуства и стравови како агент за продажба на недвижнини на островот Ванкувер. Таа моментално работи на својата трета книга, Always watching...
Ова е една прекрасна книга, полна со емоции, полна со тага и страв... која ви ја препорачувам од срце... Ви ветувам дека добро ќе се измачите и сепак нема да погодите како ќе заврши, бидејќи крајот навистина е шокантен и незамислив.