Настани

Учениците од ПСУ САБА за животот и делото на Иво Андриќ

Објавено од Слободан Пачовски Четврток, 23 Декември 2021 18:56

( 0 Гласа )

На ден 22.12.2021 г. во просториите на НУУБ „Св.Климент Охридски“ - Битола се одржа работилница со учениците од Приватното средно училиште „САБА“. Библиотекарите од нашата Библиотека накратко ги запознаа учениците со работата и истражувачката дејност што тие ја направија при подготовката на изложбата посветена на „Иво Андриќ- 60 години Нобелова награда за литература“.
Учениците имаа предизвик исто така да истражуваат за животот и делото на Иво Андриќ под менторство на професорката по македонски јазик Бисера Бијелиќ-Стојчевска. Најдобрите ученици своите есеи ги презентираа пред соучениците, темелно опфаќајќи ги животот, делото и нобеловата награда, исто така читаа прекрасни извадоци од делото „Проклета авлија„ од Иво Андриќ.
Учениците имаа можност да слушнат краток есеј подготвен од нивната професорка, за достигнувањата и карактеристиките на Нобеловецот Иво Андриќ, за кој потоа дискутираа.
Голема благодарност до професорката Бисера Бијелиќ-Стојчевска, ученичките Стефанија Кочоска, Ева Милевска, Теодора Мицеска и Теона Пејчиновска, како и до сите останати присутни ученици.
Подготвија: м-р Гордана Ѓоргиевска-Неделковски и Марија Марковска

Меѓународна конференција - 48 Собрание на БЗМ

Последно освежено на Вторник, 21 Декември 2021 12:20 Објавено од Слободан Пачовски Вторник, 21 Декември 2021 12:17

( 0 Гласа )

На ден 21.12.2021 година, дел од библиотекарите од НУУБ „Св.Климент Охридски“ - Битола учествуваа на Меѓународната конференција на Библиотекарското здружение на Македонија - 48 Собрание на БЗМ.

На оваа конференција колеги библиотекари од повеќе библиотеки од земјава и странство ги излагаат своите трудови во вториот дел од конференцијата.

ИВО АНДРИЌ – 60 ГОДИНИ ОД НОБЕЛОВАТА НАГРАДА ПОСВЕТЕНА НА БИБЛИОТЕКИТЕ

Последно освежено на Понеделник, 20 Декември 2021 11:37 Објавено од Слободан Пачовски Понеделник, 20 Декември 2021 11:29

( 0 Гласа )

Есента 1961 година Иво Андриќ ја добива Нобеловата награда за литература. Годинава се одбележуваат 60 години од добивањето на истата. По тој повод НУУБ „Св.Климент Охридски“ - Битола овој значаен јубилеј ќе го одбележи преку повеќе активности наменети како за читателите така и за библиотекарите кои Иво Андриќ високо ги ценеше.

Иво Андриќ e писател со силна имагинација, а истовремено и одличен познавач на историските услови на стара Босна, за којашто и најчесто пишувал. Основните карактеристики на неговите дела се префинетата психолошка анализа, длабокото понирање во суштинските проблеми на егзистенцијата и моќта со сугестивната магија на поетскиот збор да ја долови човечката и општествената панорама на изминатите векови. Користејќи ги народните преданија, легендите, историската фактографија, а пред се плодотворно богатство на својата фантазија и чувството за светот, Андриќ изгради монументално уметничко дело во книжевноста на оваа епоха.(Андриќ, И., Деца; 1998, стр.207)

Благодарение на големиот епски стил кој го поседувал во литературното изразување многу успешно опишувал теми од историјата на својата земја и судбината на луѓето од тие подрачја. Овој талент му ја носи Нобеловата награда за литература која му е доделена во 1961 година.
„Нобеловата награда ја сметам како огромно признание за целокупната книжевност во мојата земја“ била реакцијата на Иво Андриќ, при добивањето на Нобеловата награда. Тој оваа награда ја добива за делото „Мостот на Дрина“, како и за севкупно книжевно творештво.

Неговата најголема љубов бил пишаниот збор и читање, така што не нè изненадува неговата благородна постапка, наградата да ја подари на Босна и Херцеговина за развој на библиотекарството и подобрување на народните библиотеки низ земјата. Пишаните документи сведочат за негов исклучително богат живот, зборувал пет јазици, а пред почеток на Втората Светска Војна бил амбасадор во Германија. Во Југославија беше ценет како писател но и како човек кои што повеќе пати донирал во хуманитарни цели, особено во библиотеки. Со својот пример на скромен и повлечен човек и врвен писател имал големо влијание на средината.
„Секоја јавна библиотека е ризница на нашето општо добро наречено: книгата. Секој може да позајмува од библиотеката и затоа секој треба да придонесе во неа, а никој никогаш ништо да не земе од неа.“
По овој повод од 20.12.2021 во холот на Библиотеката е поставена изложба на неговите дела на повеќе јазици.
Подготвил текст: м-р Гордана Ѓоргиевска-Неделковски
Изложбата ја подготвија: Маријан Колевски, Марија Марковска и м-р Гордана Ѓоргиевска-Неделковски

Повеќе фотографии од изложбата на следниот линк: NUUB Facebook